Por unha Igrexa tamén feminina

Este libro é unha recompilación de artigos que a autora foi publicando ao longo de máis de vinte anos, pero que lidos hoxe soan plenamente actuais. O libro abrirá canles de reflexión plenamente actuais para as mulleres interesadas en facer escoitar a súa voz no seo da Igrexa.

A estrutura da obra é peculiar. Cada un dos artigos orixinais publicados no seu momento en xornais como La Voz de Galicia e revistas como Encrucillada, Irimia ou Terra e tempo van acompañados por un comentario, que ademais de situar cada un deles no seu contexto histórico, permite á autora matizar as súas ideas anteriores, facer balance desde a perpectiva actual e, non menos importante, pintar unha panorámica bastante detallada e completa das achegas que a reflexión feminista fixo en Galicia, tanto no pensamento como na literatura.

Nos cinco artigos recollidos encontraremos estudos xerais sobre a discriminación da muller na Igrexa e a relación entre feminismo e Igrexa, e outros máis específicos en torno á muller na Igrexa galega ou a muller no novo Catecismo. O libro conclúe cun artigo inédito escrito para a ocasión que dá título ao libro onde, ademais de introducirnos na Teoloxía feminista, reflexiona sobre o papel da acción feminista na renovación da Igrexa.

12 € (IVE e gastos de envío incluídos)

Revolucionario e místico. Diario íntimo da doenza final

Este libro é o diario íntimo dun crego fronte á morte, un home de fe rexa e loitadora, de crenza fresca e nada convencional que nos dá un exemplo magnífico: desde as primeiras páxinas se nos amosa na decisión sen fisuras de querer vivir desde a fe a nova e desconcertante situación. Sen escapismos, sacralizacións ou falsos consolos. Abríndose ao misterio, tratando de comprender, asumindo a enfermidade, afrontando a morte.

Mais o verdadeiramente admirable é a maduración dunha existencia desafiada até o extremo de si mesma, pola última das situacións límite, a morte. Impresiona observar o avance na aceptación dos demais. Maduración que acaso foi símbolo dunha reconciliación máis profunda consigo mesmo. Non por "conversión" ou cambio de rumbo, senón por reaxustamento definitivo, como baixada estremecida e confiada aos fondais últimos do ser.

Desde o primeiro momento, Moncho "ora á súa enfermidade", vívea ante Deus, cun internamento progresivo na confianza e na intimidade. Non é simplemente que nolo diga el ("paréceme que me fixen máis espiritual", "hoxe son un contemplativo"). Observámolo nós. Sobre todo, nesa absoluta naturalidade coa que, de xeito continuo e desde o comezo, a reflexión se converte en oración directa, fervente, con sempre novos motivos e matices.

Esta monografía está esgotada. Na pestana "SÓ EN DIXITAL" pódese baixar en PDF.

Por: ENCRUCILLADA